Annerschd äns

Sei Kindhääd, die war ganz geweehnlich, er war sefriede un aa freehlich.

Hott ganz normale Interesse, un duut sich gär mit annre messe.

So langsam isser greeßer wor, un manches kommtem annerschd vor.

In Kino, Fernseh, Illuschdrierde, duuschd du als Bu mit Määd bussiere.

Er denkt sich, in die Pubertät,kommt er äfach eher spät.

Weil, sei Sehnsucht no de Frau, die war immer schunn sehr mau.

Zum Nochberschbu, zum Frank, hodder geschbeert e Drang.

Sie hann sich immer gut verstann, bis der hott e Freindin dann.

Er war eifersichdisch uff das Määde wor,

das Ganze kummtem komisch vor.

Er denkt, ich bin net normal, wenn ich net so bin wie all.

Un annerschder is selten gut, weil mer net zugeheere duut.

Er hott geheert vum Ungel Karl, wo Gott sei Dank im Kriech gefall.

Der war fer die Bagaasch e Schann, weil der uff Männer hott gestann.

Die hann Geschichde ihm vezehlt, wie se de Ungel hann gequeelt.

Als Kind is der gedachdelt wor, un rumgezerrd an seine Hoor.

Sei eichner Vadder saat zum Bu: „Du geheerschd nimmie dezu!“

De Mamme warn zwarTräne kumm,

doch hott´s ne net in Schutz genumm.

Wie der war in de HJ, hodder Schlää kried all Gebott.

Als Soldat gingsem net besser, stännisch kam er unners Messer.

Sie hann es Lääwe ihm vegällt, als Schwuchtel in de Männerwelt.

Un wann er noch so tapfer war, sei Freinde ware aarisch rar.

Fers EK warer geschlaa vor,

un dabber vunn de Lischd gestrich wor.

Warsche offen homosexuell, bische ins KZ kumm schnell.

Das Schicksal stand em wohl bevor, bis er in Stalingrad erfror.

„Der war e dunkler Fleck in de Familie!“ saat noch heit es alt Otilie.