Buama

Gmoand is freili nid S´landl drüm in Myanmar, sondan mia, de Buama hoid. De Steiger, Geiger und Strawanza, vom Sepp üwan Ruap bis zum Schwoga vom Ridiga sein Cousin und driwa hinaus, oi mid weng am Klescha und da Attitüden das des scho ged. Went´ Blosn voi is und ma si entscheiden muaß, zwischn Gstripp oda Hauswond, wenst aufstehst und an nein göbn Strich an deina Fassad bemerkst, don woans de Buama. I ho ois gsechn Bauchinger, a Hirsch woas, der is ausm Woid aussa und hod da zuawibrunzt, don wora wida dahi, is wida eie in sein Woid, dea Sauhund. Da Bauchinga schaut mi bes o. A Hirsch sogst, mogst woi recht hom, owa oba Heandln kob hod, do bi i ma nid so sicha. Woi woi, mogst ma scho glaubn, auf oie 4re isa galoppiert, und sche wora. Bledsinn, moand sei Frau, des woa oana vo eich, gebsas zua und a Rua is. Na Froni wen is da sog, des woa a Hirsch.

Aus wia wen a Hirsch zum Brunzn do owakrein dat, des glabst a woi söwa nid. Des mim Woif hod uns a koana glaub, bisa don dogstondn is, jedsmoi wida moants mia waratns gwen, aus datn mia Tog ei Tog aus duachn Oat laufn und eichane Brunna vagiftn, owa is scho recht Froni, moch an Obstrich und schickn noch Wean, de hom sich a Freid damid.
Jiaz was gnuag moand da Bauchinga, vaschwinds eich und gebs a Rua. Scho recht. Am Nochmittog sitztns don drei, und da Huawa vazeid vo so am Trottl dea an Hirsch beim Forstweg zomgfoan hod. Natialich hod do koana an Zusommenhong festgstöd, warum a, a Hirsch ko nid zoin und do sans wascheinli a no vo söwa drauf kema de Bltzgneißa, eiso stema zwoa Tog spada mid am Küwi weißa Foab voa seina Tia und hoffn das eam es Geib nid mea zuasog, wei des wa mea zum moina. Soso, locht de Froni ausm Hintagrund fira, don hobsas eiso doch eigseng. Eigseng, wos? Mia dan da an Gfoin und im Noamalfoi sog ma Griaßti, donksche und Pfiati, owa wiast moanst.

Don gema umi zum Bauchinga sein Nochban beschied song, damid dea nid de Kiwara oruaft und uns weng schwoazoaweit ozoag. Den gem ma an Kostn Bia, don hoda fia 2-3 Stund wos zum doa. Sei Frau lond uns auf an Kaffee ei, obwois gonz genau woas, das koana vo ins sowos sauft, scho goa nid bei so ana Hitz, owa wos sois.

Don pock ma wida zom und foan aufi zum Boch, do san koane Leit wei si koana mea drüwafoan traut, wei do hiaz ollawei a Glumpat drin lig des eana de Untaseitn vom Auto zkrotzn kant, wei koana de Stoana und den Dreck wegramb dens daheagschwoab hod beim letzten Unweda. Do gibs nohand nix und neamb, ausa ins, a boa Bama und in Boch, und do sitz ma nochand und losn, wei ma goa so gfealiche Buama san.