Der Trapplaza

Wia i des Wort, Trapplaza, hob g’hört, es kummt, hob’ns mir g’sogt vom Trapp’n, do hob i miaß`n herzhoftig loch’n. Wos heitzutog’s den Leit’n olles einfoll’n für Soch’n.

Wos soll den des sein, hob i gonz g’scheit gefrogt. Do hot darauf wer folgende G’schicht dazua g’hobt.

Wenn’st auf die Olm geh’st, tuats meistens jo onstrengend werd’n. Do sulltest donn glei bei aner Hütt’n zukehr’n.

Durt wird gern z’ommen g’sess’n und a musiziert. Und am End von der Gaudi wird des vom Essen ausg’löste, Bauchweh kuriert.

Doch des tuat die Wonderer noch long net vazog’n. Sie hob’n muats a Hetz und tuan sie bestens vatrog’n.

Doch bevor es bold weiter geht auf derer Roas. Gibt’s z’erscht den Trapplaza, von dem wird’s iahna schia hoaß.

Der Trapplaza is ah Stamperl mit Schnops, vielleicht a guat’s Zirberl sogoar. Davon wird der Bauch und die Gedanken glei wieder kloar.

Und ah die Schritt‘, die werd’n locker und leicht. Sowos is freilich wichtig, weil am Obend wird des Gros jo vom Tau schon gonz feicht.

Damit kuaner herfoll’n tuat auf dem stoanigen Weg’n, dafür gibt der Trapplaza jedem Wonderer a noch sein Seg’n.

Weil oft tuans jo schon in die Nocht einikemman. Noch dazua müaß’ns beim Huamzua geh’n jo zwoa Schritt auf uanmol glei nemman.

Dos der Muat hiatz net ausgeht, beim Bergobigeh’n. Dafür tuat da Trapplaza freilich ah steh’n.

So wird noch am Rückweg die Freindschoft begoss’n. Natürlich ah nebenbei die schiane Londschoft genoss’n.

Bold geht a der Mond auf über der steirischen Olm. Mit an Trapplaza im Herzen tuat oll’n die Stimmung himmlisch guat g’folln.

So verrinnt, für die lustig’n G’sœllschoft, beim Obsteig’n vüel zu schnell die Zeit. Hiatz is wenigstens bis zum Parkplotz schon gor niama weit.

Noch schnell an Schluck von dem Trapplaza für den noch verbleibenden Muat. Für die Autofoahrer ist des Getränk oba eh net recht guat.

Der Chaffeur hot leider den schworz’n Peter obkriagt. Der hot von den Trapplaza den ganzen Tog no nix g’spiart.

Wos i sœlber über den Trapplaza hiatz woaß gonz für g’wiss. Nämlich, dos er so a Oart Schrittmocher is‘.