die späten Jahre

Es is ka Spaß, waunst öta wiast. Jetz hob i grod scho wieda a Bischl Hoa in da Biaschtn ghobt. Am Schedl weans dafia imma weniga. Nua duat, wost as goa net wüst, do wochsns. Do kaunst zupfn mit da Pinzettn. Waunst as dawischst. Wäu segn tuast jo a nix mea, trotzdem das de Brün imma dicker wean. Guat, dafia sigst a net, wia de Foitn imma mehr. Und imma tiefa wern. Dauand host Bresln mit die Zänd. A waunst goa kane Bresln gessn host. Entweda druckns, oda se foin da ausse. Hean tuast a nimma guat; des merkst oba erst, waun da de Nochban am Gaung dazön, wosd gestan im Fernsehn gschaut host. Wos a wieda guat is, wäust as eh nimma waast. Amoi hob i ma Kopfheara kauft. Mit Funk. Na frog mi net, wia laung i braucht hob, bis i de zum Renna brocht hob! De neiche Technik wochst da schnölla iban Kopf ois de Brennessln im Hof. Und a Betriebsaunleitung besteht heit entweda aus a poa Büdln, die ausschaun wia wauns da Kandinsky gmoint hätt, oda aus 375 Seitn so klaa druckt, dast zum Lesen es Rastermikroskop und 3 Monat Zeit brauchst. Dabei kau unsaana do net amoi mehr drei Stund laung irgendwo sitzn. Es Kreiz tuat da weh, es Gnack tuat da weh, frog mi ned! Und gehst amoi a Runde, tuan da de Fiass weh. Waun da net vuaher scho de Luft ausgeht. Es Herz is hoid a nimma des, wos´s amoi woa. Puiva host so vü, dass da Apotheka vo dir allane lebn kennt.

Es Menü beim Wiatn vatrogst a nimma, und es Bier vatrogt si net mit deine Tablettn. An Bluatdruck host, an Ischias, de Baundscheibn san hin und es Hirn is vakoikt. Z´Mittog waast scho nimma, wost in da Frua gessen host. Dawäu is ´s eh oiwäu dessöbe. De Naumen vo de Nochbarn foin da nimma ein, de muast am Tiaschüdl olesn. I bin froh, dos i no waas, wo i wohn.Es Z´saumrama wird da a zur Plog. Glaub ma, der Staubsauga woa fria net so schwaa! Oba es sichts eh kana, wauns ausschaut. De Freind wean jo a imma weniga. Waunst wen bsuachn gehst, daun meistns am Friedhof. In da Nocht muast drei Moi aufs Heisl, und um fünfe in da Frua bist putzmunta. Dafia schlofst um hoiba ochte bei da Zeit im Büd scho ei. Is oba a wuascht, wäu da Tatort nochher is garantiert eh a Wiederholung. Dafia, waunst eam do amoi dalebst, passts a wieda, wäust di nimma erinnan kaunst, weas woa.Na, es is ka Spass, waunst öta wiast.

Nua maunchmoi, in da Frua, do gfrei i mi scho! Wäu do leit mir ka Wecka mea! Do kau i liegn bleibn bis uma öfe und daun in gaunzn Tog im Park sitzn und trotschn und de Spotzn fiadan; und de Pense kummt trotzdem jeds Monat aufs Konto. Waun i mit de Potschn zum Greissla hatsch, schaut mi kana mehr bled au, und de schwaan Einkaufstoschn trogt ma da Nochbasbua auffe. Und waun i zum Dokta foa, kriag i in da Tramway ollawäu an Sitzplotz!

Leiiwaund is´s a mit de Enklkinda. Denan kau i a Trommel und a Trompetn schenkn, ohne dos mi da Wiabl steat! I kauns noch Strich und Fodn vawehna und mit eana bledln, fia die Erziehung san aundare zuaständig!

Auns Meer foa i im Mai, waun sunst no kana duat is und mei Haundtiachl des anzige am gaunzn Straund. Mitn Voda von da Zimmerwirtin spül i Schach, und maunchmoi sing ma a, gaunz laut, und gfrein uns afoch, dass´s uns, auf unsa Oita, eigentlich eh no gaunz gut geht.