Die Weihnachten sind vorbei

De Weihnochtn san vorbei. Jetzt host den Bam zu entsorgen und den Schmuck zum varamma. De Kugln in de passenden Schochtln zu verstauen. De Kettn sche locker in a Schochtl pockn das ned vadruckt san nächstes Johr. Des Lametta sche auflegen und in a Folie eiwickln, weu des soi nächstes Johr a no auf den neichn Bam. Jedes Johr wos neiches kaufen des maß jo ned sei, weu sporn is augsogt, wia imma. So jetzt is ollas vapockt, jetzt haßts auf auf de Latta und ollas varamma, im, oder aufn Kosten, das holt ned im Weg umanaunda steht.

Hobn ma des dann gschofft gehts aun de Deko, weu wia jedes Johr nemma uns vur des nie wie da zu mochn, weu des heramma dauert drei Stund und des wegramma no länger. Nau gemmas holt wieda au. Des Filigrane gut eipockn weu nächstes Johr, do moch ma des eh nimma, aba hi wern soills holt a ned. De Kerzen, de nur zur Deko do worn, de werden ma nächste Weihnochten auzindn. De Figurn und ollas andere Larifari pock ma in a dünnes Seidenpapier ei, es is fir de Erben, weu mia werden des nächst Johr nimm auspockn. Mia san jo ned bled und tun uns de Hockn nächsts Johr wieda au.

So jetzt is ollas eipockt, ollas vastaut, oba fertig san ma no lang ned. Wie jedes Johr is der Dreck, der do obefollt, ned von schlecht Öltern und es maß gsaugt werdn und dann no aufgwoschn, um ollas wie da sauba zu hobn. Jetzt tuat ma is Kreiz weh, i bin hundsmiad und denk ma wia bled kaunn ma sei, sovü Orbeit fir zwa Tog wo ma Besuch ghobt hobn und de den Bam und de Deko bewundert hobn. Na nächst Johr nimma.

So fertig, jetzt kaunn ma vom Bodn essn und ollas glänzt und spiaglt. I setz mi hi und schau mi um, de Kastln sahn leer, es steht ka Deko um, ollas is leer und es schaut aus wia in ana Klinik. Na des gfollt ma ned, do muaß wos her. A Deko firn Fosching vielleicht? No und jetzt sogst no amoi i bin no zum rettn. Schowida Deko herramma und wer denkt auns wegga ramma . I ned. Wia blöd maß ma sei. Ach Gott i wed mi nimma ändarn. Ans kaun i eich heit schon sog, nächst Johr werd i wieda des sölbe mochn. An schenan Christbam mit vü Schmuck, mit bunten Kugln und Lametta, das ollas nur so glitzert. Überoll Deko, Kerzen Figuren und a schene Krippn. Is Weihnochtsdorf darunta und olle werdns wieda bewundern. De zwa moi, wo wer kummt. Oba eigentlich moch i des do fiar mi, weu i olda Esel do maunchmoi a no a Kind bin.

Weihnochten is nur amoi im Johr und do derf ma des sei. Oda wos sogts ihr?

Jetzt denk ma nua mehr auns neiche Johr, mochen Vorsätze, de ma sicher zwar Wochn einholten, oba ned länger weu mia wollen leben und net darben. Is anzige wos vielleicht fia mi gut wa, wann ma is Essen ned so gut schmeckat. A wengl weniga Gwicht wa fir de Gsundheit guat und a fir de Luftzufuhr, de mi in letzte Zeit seit meiner Virus-Gschicht, a bissl plogt. Oba a do maß i durch. I werds übalebn, weu i a Steh-auf- Mandl bin. Gott sei dank sunst wa i scho laung dahi.