RODE FINGANÄGI

Im Dezemba 2019 hob i wieda amoi an draufghaut, so à la Mila Kunis in „Bad Moms“, und bi mit a paor Freind durch Stockholms Nochtlebn zogn. Moch i im Durchschnitt so olle 6 Monat amoi, es ghert gonz oanfoch zu meinem Expat-Dasein Repertoire dazua. Nua mit dem Unterschied, dass mi diese eine Partynocht a poar Monate späda des södsamste Valentinserlebnis beschert hot.

Mi hot scho imma des Phänomen der Schenheitschirurgie intressiert, und a vasuacht z’versteh warum des auf da gonzn Wöd so an wichtign Stönwert in unsra Gsöschoft kriagt hot. Warum Frauen si gern wos in d’Lippn einispritzn lossn um dann wia Entnschnobi auszschaun. Onscheinend ziacht des die Mona o. Und oans muass i a nu festholtn: in der schwedischen Hauptstodt is des nu a Spua eaga, glauben’s ma, i hob jetzt scho in a poa lässign europäischn Metropoln glebt und woass wovo i red! Trotzdem woa i net bereit, mia a Nodl in die Lippn einijogn z’lassn, nua damit i dem vermeintlichn Geheiminis der Verführung des anazwoanzigsten Joarhunderts auf die Spua kema ko.

Rote longe künstliche Nägi, des muass reichn, hob i ma docht! Najo, irgendwos Neichs derf a i ausprobiern. Oiso bin in loszogn und hob mia so billige Fake-Nägi im näxtn Supamoakt kauft und auf meine Finga aufipickt. Stockholm Night Life, here I come! Meine „Pornonägl“ woarn DER Hit schlechthi, die Männer hobn mi umkreist wia a Schwoarm Fliagn! Do hobn diverse Duckfaces net die geringste Chance ghobt!

Ois politisch interessierte Person hob i den gresstn Teil vo meim Obend damit vabrocht, mi mit am konservativen pro-europäischen Politika z‘unterhoidn. „Treffa“, hob i ma docht – natirli rein beruflich gmoant, i bi jo glücklich verheirat und hob zwoa fantastische Kinder.

Am nächstn Tog hot der Kopf gscheit brummt, die politischn Diskussionen woarn zach. Da „Koter“ woar oba nix im Vergleich zum Schmerz, den i ghobt hob, ois i versuacht hob diese verdommtn roten Nägi obazkriagn! Wurscht is, des woars wert, immerhin hob i mein politischn Zwilling gfundn! Mit dem kon i Schweden EUphorischer mochn und die Schwedn füa EU-Themen intressiern! Mei europäisches Herz is in dem Moment vor Freid ghupft! So sehr, dass i bereit woar, sogar am Valentinstag nu amoi mit meim neichn europäischn Freind unter Millennials, Geschäftsleutn und Duckfaces zu mingeln.

Nur dass i an dem Tog donn ohne foische longe rote Nägi auftaucht bi.

Und do heat de „Liebesgschicht“ a scho wieda auf.

Fazit 1: Don’t fake it until you make it! I schoffs a so – alloa und ohne mi z‘vastön – Europa den schwedischen Bürgarn a Stück näha z‘bringa!

Fazit 2: Heit geh i wieda mit meim Mo zur Feier des Valentinstages obndessn! Better the devil you know…

Fazit 3: Füa mi und Europa is 365 Tog im Joa Valentinstog!