Unsre Berge / Restlvawerterin

Wenn ich auf unsre Berge schau

siag i nur grau und grün

woas is bloß mitn Weda los,

dös is jo nimm schön.

Woann i auf unsre Stroass`n fahr,

do steh i meist im Stau,

wann i groad am wegfoahr n bin

was i dös ganz genau.

Dö Hundert auf das Autoboah

dö kumman jetzt groad recht,

wäu döse schnölle Autofoahrn

woa fürs Klima schlecht.

Vü Luft kommt aus dem Auspufftopf,

da Schnee aus da Kanon,

dö Gletscha dö hoam a schon gnua

und rinnen uns davon.

Woann i auf schöne Miss`n schau,

do renn i glei davon,

mit Botox san dö Lippn gspritzt,

da Rest is Silikon.

D´Hoar san gfabt,

d`Wimpern foisch, mia wird schlecht,

oiss is nit künstli gmoacht,

die Dummheit die is echt.

Wenn i in Richtung Ost`n schau,

sich i a große Stoadt,

dö kostet uns an hauf`n Göd,

dös owa koana hoat.

Die Türk`n standen einst davor,

dö Russn woarn schon drin,

si hoam sis nit leistn kinna

und so is uns bliem.

D`Medien hoam Hochsaison

seit in IBIZA dös war,

dazu tuans fest analysieren,

zu woas brauch`ma nu a Woih.

____________________________________________________________________________________________________________________

Jo liabe Leit do foid ma groad ei,

wia mein Weiwal spoasam ban koacha koa sei,

is do auf d`Umwöd recht bedoacht,

woanns oi Toag zan koacha was moacht.

Tuat in a Supp`n Karott`n moi drei,

kumman dö Schoin in den Biomü rei,

und va Erdöpfin, Zwüfi, Zitronen, Paprika und Antüfi,

Opfi, Kirschnkern und Mandarinen

soammit si ois mögliche drinnen.

Gibt`s amoi a Brat`l mit an Braunschwaiga-Kraut,

werd`n nur dö herdaunan Blattl`n einig`haut.

Beim Krautstengl do gibt`s ihr an Ruck,

dö tuats aus`n Biomü wieda z`ruck.

Do foid ihr auf oamoi groad ei,

heit muaß vorm Brat`l a Krautstenglsupp`n sei.

Zum Frühstück gibt`s a poar kochte Oa

und dö Schoin hoam a nu Ploatz im Lawoa.

Wia dös Lawoar woa gefüllt bis zan Roand,

denkst a so nach mit Hausvastoand,

Da Moa steht danebn, denn wird schon ganz üwi,

wäu`s goar so tief einischaut in Küwi.

Woas hoat`s denn jetzt groad wieda in Sinn,

woanns siacht, was im Lawoar ois is drinn.

Denkt sie, i kunnt mit Rest`l a nu was moacha,

nenna tuat sis plötzli Umwödkroacha.